John 17
Ísu kwená kwaásiyavena ísámai ÁánútumpaꞋa námúnaa siráin-kwasai.
1Ísu simásuwena kwíyómpaꞋa awánéna séna kesivoó minkánáámá kwétiye. kesúwíꞋa anómba inaꞋá enáwíꞋa anómba umánkáano. 2amápa-kwaasi tavíkáundayavai asirayámbá símakaanda póꞋa símakaanda-kwaasi aúnáiꞋa umái maíꞋmaiꞋa umátinkaunda mindáyavai kesúwíꞋa anómba inaꞋá enáwíꞋa anómba umánkáano. 3eyááma árair-Isoigoma óne. kembá siꞋmákaandanaꞋa úne. empáré kempáré tésa kenkáísááima ísááwai aúnáiꞋa umái maíꞋmaiꞋa kwéowe. 4marapáꞋá enáwíꞋa anómba umái símakaanda-mayaima ánásaumne. 5kesivoó maramá íma taróruraandaraꞋa esé máyauyana kesúwíꞋa anómba kwáyáinkaꞋa po ókwaraꞋa mirán-ínkwáeꞋa kwésune. 6marapá-kwáásívínkémbá ená kwaási-iꞋa umátinke símakaandawaima entáváí mirándáꞋá máyáiye simái paárumatinkaunasa enáái kwéisaawe. 7símakaandayavesa sésa mintántááꞋá Áánútu ámakain-tantaare kwésewe. 8símakaanda-aimba simátimunda kwéisaawe. enópakemba kunkáunda-aimba isésa sésa Áánútu aiꞋmákaisana kunkáiye kwésewe. 9miwíyávéꞋa ísámai kwéaisaa-une. marapá-kwáásí úwoi-kwaasiyaveꞋa íma áísaa úmpo símakaanda-kwaasi ená kwaásiyaveꞋa ísámai kwéaisaa-une. 10ená kwaási kesí kwaásiman-owe. kesí kwaási ená kwaásima ésa kesúwíꞋa anómba kwéowe. 11marapáꞋá íma máénda enópaꞋa íyóndanivo miwímá marapáꞋá ménaaowe. kawe-késívóo miwíráꞋá emá taviyénda pósa Áánútumbo ááyaan-kwaasi-iꞋa umái ménaaowe. esé kesémo tarúmaimo maúyantemba miwímá tarúmai ménaaowe. 12miwísé méꞋa tavíkáunda Áánútumbo ááyaan-kwaasi-iꞋa umái mésa íma sáwí-amba kwakáawe. ánivo moóráwai sáwí-amba kwaránímba póna mináímbá Áánútun-aai aúváívimba agaimaréna siráin-aimba paáriniye. 13enópaꞋa íma iyúnda marapáꞋá méꞋa miwí tirumpimbá kesí aamoi-yántáákó anómba kwégwaintavai mináímbá kwésimatimune. 14enáái simátímakaumne. kemó ímo áraiꞋo marapá-kwáásímó úndantemba miwímá íma áraiꞋa marapá-kwáásímá ombá pósa marapá-kwáásí úwoi-kwaasima tíyámba kwéumatinkaawe. 15íma séꞋa miwímá marapákémbá kuntiraaó súmpo Sáátáánigo sáwíꞋa umátínkáivo se taviyiyó kwésune. 16kemó ímo áraiꞋo marapá-kwáásímó úndanten-umai miwímá íma áraiꞋa marapá-kwáásímán-owe. 17enááima árair-aimba póna tirumpimbá kwáyainasa ená kwaási-iꞋa umái ménaaowe. 18kembó siꞋmaráánaꞋo marapáꞋó kunkáundantemba miwímá tiꞋmáráanasa marapá-kwáásívímbá ménaaowe. 19miwíyáváíyé séꞋa enarááíye suꞋmai kwaráúnda pósa enarááíye suꞋmai kwaránááowe.20íma maankwáásíyé suꞋmaiyaveꞋa áísaa eꞋa súmpo miwí táái isésa kentávésa sésa áraiꞋa Áánútunopakemba kunkáiye síyawaiyavaigwaraꞋa kwéaisaa-une. 21kesivoó áísaa eꞋa séꞋa esé kesémo tarúmaimo maúyantemba miwímá enté kentévaꞋa tarúmai ménaaowe. miwímá tarúmai máyáamba pósa marapá-kwáásí tuwánésa sésa áraiꞋa Áánútuma Ísumba aiꞋmákaisana kunkáiye sénááowe. mindáyaveꞋa námúnaavinkemba kwésimamune. 22esé kesémo mimbóráíꞋo umáímo maúyantemba símakaanda-asirayamba tímakaunda pósa mimbóráíꞋa umái ménaaowe. 23emá kesé tarúmai máénaꞋa kemá miwísé tarúmai máyaunda pósa miwímá tarúmai ménaaowe. marapá-kwáásí mindá tuwánésa sésa Áánútuma Ísumba aiꞋmákaisana kunkáiye sénááowe. enarumbá símakaandanten-umai miwígwáráꞋá tímakaanda pósa marapá-kwáásí tuwánésa sésa áraire sénááowe. 24kesivoó maramá íma taróruronkaꞋa enarumbá siméma asirayámbá símakaane. símakaanda-kwaasi kesé maígwáe séꞋa súnda pósa kesí asirayámbá awánanaaowe. 25kesivoó arupínako óne. marapá-kwáásí embá íma kwéawanaambanivo kemá awánáúnda símakaanda-kwaasi kentávésa sésa Áánútuma aiꞋmákaisana kunkáiwaiye kwésewe. 26entáváí mirándáꞋá máyáiye simái paárumatimunasa enarumbó símakaandantemba miwí tirumbá simíyaꞋa miwísé ménaumne. entáváí mirándáꞋá máyáiye simái paárumatinkareꞋa paárunte kónaumne Ísu námúnaavinkemba mirá siráiye.
Copyright information for
KZE